១. មានដុងខាងគណិត៖ ខួរក្បាលវៃឆ្លាតពីកំណើត។
២. ចូលចិត្តការគិត៖ ត្រូវរៀនពត់ចិត្តខ្លួនឯងឲ្យចូលចិត្តមេរៀនដែលគិតច្រើនទាក់ទងនឹងដំណោះស្រាយ។
៣. រៀនមេរៀន និង ទ្រឹស្តី សន្សឹមៗកុំបំបោល៖ ព្យាយាមរៀនមេរៀន និង ទ្រឹស្តីឲ្យចេះចាំច្បាស់បន្តិចម្តងៗ ចំពោះអ្នកមិនសូវឆ្លាត គឺមើលហើយមើលទៀត មើលទាល់តែយល់ បើនៅតែមិនយល់ទៀតសួរគេ តែត្រូវទន្ទេញឲ្យចាំ នោះវានឹងអាចជួយអ្នកបានក្នុងពេលធ្វើលំហាត់នៅថ្ងៃក្រោយ។
៤. អនុវត្តធ្វើលំហាត់ក្នុងមេរៀននីមួយៗឲ្យអស់ ហើយផ្ទៀងជាមួយអត្រាកំណែរ៖ ធ្វើលំហាត់តាមលំដាប់លំដោយវានឹងអាចវាស់ស្ទង់សមត្ថភាពអ្នកថាយល់មេរៀនកំរិតណា ។
៥. ទិញសៀវភៅគណិតវិទ្យាល្អៗ និង តាមកម្រឹតមកស្រាវជ្រាវបន្ថែម៖ លំហាត់ក្នុងសៀវភៅពុម្ភមិនគ្រប់គ្រាន់ទេសម្រាប់អ្នក ដូចនេះត្រូវទិញសៀវភៅកំណែរ ឬ វិញ្ញាសារមកមើលនិងធ្វើបន្ថែម។
៦. សួរអ្នកដែលរៀនពូកែៗ ឬ គ្រូរបស់អ្នកចំពោះលំហាត់ដែលគ្មានចម្លើយផ្ទៀងផ្ទាត់៖ បើមិនច្បាស់សួរគេបន្ថែម និងផ្ទៀងផ្ទាត់ចម្លើយដែលអ្នកបានធ្វើទៅនឹងអ្នកដទៃ ឬគ្រូរបស់អ្នក។
៧. អនុវត្តធ្វើដដែលៗលើលំហាត់ដែលពិបាកយល់ និងធ្វើមិនចេញបន្ទាប់ពីមើលអត្រាកំណែរ៖ វាអាចជួយអ្នកបានចំពោះលំហាត់ពិបាកយល់ពិសេសលំហាត់សិស្សពូកែ។ ពេលអ្នកធ្វើវាម្តងជាពីដងនោះអ្នកនឹងអាចយល់ពីគន្លឹះរបស់វា។
៨. ព្យាយាមចងចាំល្បិច និង គន្លឹះដោះស្រាយ៖ កុំចំណាយខួរក្បាលរបស់អ្នកទៅចាំគ្រប់ជួរទាំងអស់ ត្រូវចេះរកគន្លឹះរបស់។
៩. មើលកំណែរ ឬលំហាត់គំរូរពេលយប់ ហើយរៀនធ្វើវិញនៅពេលព្រឹក៖ កុំមើលភ្លាមធ្វើតាមភ្លាមវាអាចខាតពេលវេលាក្នុងការមើល ពេលមើលត្រូវមើលឲ្យយល់ ហើយស្អែកឡើងចាំសាកល្បងធ្វើលំហាត់ដែលបានមើលទាំងអស់នោះឡើងវិញថាតើយើងយល់និងចេះបានកម្រឹតណា។
១០. ព្យាយាមចងចាំរូបមន្តសំខាន់ៗក្នុងមេរៀននីមួយៗឲ្យច្បាស់ ចាំកាន់តែច្រើនកាន់តែល្អ៖ ត្រូវចងចាំថារូបមន្តជាគន្លឹះដ៏សំខាន់ក្នុងការដោះស្រាយលំហាត់។ អ្នកអាចសរសេរ ឬបិទរូបមន្តនៅក្នុងបន្ទប់អ្នក ឬកន្លែងណាដែលអ្នកតែងតែមើលឃើញជារៀងរាល់ថ្ងៃ។
១១. ធ្វើលំហែរខួរក្បាល ដោយការដើរលេង លេងកីឡា… ៖ ខួរក្បាលក៏ត្រូវការសម្រាកដែរ ដូចនេះយើងត្រូវចេះប្រើប្រាស់ខួរក្បាលឲ្យល្អ កុំរៀនហួសកំណត់ ព្រោះវាអាចធ្វើឲ្យអ្នកឡប់ទៅវិញ (ដើរបេះស្លឹកឈើ)។
ព្យាយាមអនុវត្តចំណុចខាងលើចាប់ពីចំណុចទី២ មក ប្រសិនបើអ្នកមិនមានដុងពីកំណើត នោះវានឹងអាចធ្វើឲ្យការសិក្សារបស់អ្នកប្រសើរឡើង ហើយវាអាចធ្វើឲ្យយើងធ្វើស្វ័យសិក្សាលើសពីកម្រិតដែលយើងកំពុងរៀនក្នុងថ្នាក់។ មិនតែបុណ្ណោះ អ្នកអាចអនុវត្តចំណុចទាំងនោះទៅលើគ្រប់មុខវិជ្ជាដែលអ្នកចូលចិត្ត។
0 comments:
Post a Comment